Liebi Filasez-Chind
Ich blicke mit eu uf 3 1/2 sehr intensivi und ereignisriichi Jahr zrug. Mir händ sehr viel erläbt zäme. Mir händ Theater gspielt, ässbari Wildpflanze känne glernt, sind is Mittelalter abtaucht, händ zäme schriibe, läse und rächne güebt. Und no ganz vill meh!
Ihr händ mich teilwiis gseh, wien ich zum chnurrige Drache oder zur fauchende Chatz wird. Aber ihr händ mich au vill gseh lache, singe oder gar chli Blödsinn mache.
Ich möcht eu danke säge für die Ziit, für eues Mitschaffe, Mitträge und für eues Vertraue i mich.
Als Erinnerig chömed ihr es Säckli über mit zwei Samebombe drin. Die eint git e Summervogel-Wiese und die anderi git Wildchrüüter. Lönd sie la wachse und dänked chli a mich. Hoffentlich isch es mir nämli au glunge, bi eu s’eint oder andere Sämli z’pflanze und wachse z’lah.
Es hät zuedem no en Halbedelstei drin, wo eu sött mit sinere bsundere Chraftbegleite i eure Zuekunft. Für die wünsch ich eu nume s’Best und ich hoffe, dass ich ab und zue wieder drin wird vorcho.
An dieser Stelle möchte ich mich auch bei den Eltern und beim Team bedanken für diese spannende und intensive Zeit. Danke auch euch für euer Vertrauen und eure Zusammenarbeit.